കിഴങ്ങ് വര്‍ഗങ്ങള്‍ ഗ്രോബാഗില്‍ വിളയിച്ചെടുക്കാം......

നഗരത്തിലും ഫ്ലാറ്റുകളിലും താമസിക്കുന്നവര്‍ക്ക് കൃഷി ചെയ്യാന്‍ സ്ഥലപരിമിതി ഏറെ പ്രശ്‌നം സൃഷ്ടിക്കാറുണ്ട്. ഗ്രോബാഗിലും ചാക്കിലും കൃഷി ചെയ്യുകയാണ് ഇതിനുള്ള പ്രതിവിധി. എന്നാല്‍ പച്ചക്കറികളാണ് ഇത്തരത്തില്‍ ഏറെ കൃഷി ചെയ്യാറ്. ചേന, ചേമ്പ്, കപ്പ തുടങ്ങിയ കിഴങ്ങ് വര്‍ഗങ്ങള്‍ ഗ്രോബാഗില്‍ കൃഷി ചെയ്യുന്നത് വളരെ കുറവാണ്. എന്നാല്‍ കിഴങ്ങ് വര്‍ഗങ്ങളും ഗ്രോബാഗിലും കിഴങ്ങ് വര്‍ഗങ്ങള്‍ കൃഷി ചെയ്തു നല്ല വിളവ് നേടാം. ഇങ്ങനെ കിഴങ്ങ് വര്‍ഗങ്ങള്‍ കൃഷി ചെയ്ത് പതിനഞ്ച് കിലോയുള്ള ചേനയും 20-25 കിലോ തൂക്കമുള്ള കപ്പയും വിളയിച്ച് എടുക്കാം. ഇതിനുള്ള മാര്‍ഗങ്ങള്‍ പരിശോധിക്കാം. കിഴങ്ങ് വര്‍ഗങ്ങള്‍ കൃഷി ചെയ്യാന്‍ വലിയ ഗ്രോബാഗാണ് ഉപയോഗിക്കേണ്ടത്. ഇവയ്ക്ക് നൂറു രൂപവരെ വിലവരും മാര്‍ക്കറ്റില്‍. ഗുണമേന്മയിലും കാലപ്പഴക്കം കൂടുതലുള്ളതുകൊണ്ടും ഇത് ഉപകാരപ്രദമാണ്.

ഗ്രോ ബാഗ് കൃഷിയിലെ ഗുണങ്ങള്‍

1. ഗ്രോ ബാഗിലെ നടീല്‍ മിശ്രിതം നാം തന്നെ നറയ്ക്കുന്നതായതു കൊണ്ട് വളക്കൂര്‍, വായു സഞ്ചാരം എന്നിവയുണ്ടെന്ന് ഉറപ്പാക്കാന്‍ സാധിക്കും.

2. കൊടുക്കുന്ന വളം, വെള്ളം എന്നിവ പാഴായി പോകുന്നില്ല.

3. സൂര്യപ്രകാശവും പരിപാലന സൗകര്യവും നോക്കി ഗ്രോബാഗ് എവിടെയും കൊണ്ട് പോയി വെക്കാം.

4. കളനിയന്ത്രണം, വളപ്രയോഗം എന്നിവയ്ക്ക് വളരെ കുറഞ്ഞ സമയം മതി.

5. വലിയ കായിക അധ്വാനമില്ലാതെ പെട്ടന്ന് ഗ്രോബാഗില്‍ നിന്ന് വിളവ് എടുക്കാം.

6. വിളവെടുപ്പിന് ശേഷമുള്ള നടീല്‍ മിശ്രിതം വളങ്ങള്‍ ചേര്‍ത്ത് വീണ്ടും കൃഷി ചെയ്യാന്‍ ഉപയോഗിക്കാം.

നടില്‍ രീതി

സാധാരണ ഗ്രോബാഗിനെ അപേക്ഷിച്ച് അഞ്ച് ഇരട്ടി നടീല്‍ മിശ്രിതം വേണ്ടിവരും ഈ വലിയ ഗ്രോബാഗ് നിറയ്ക്കാന്‍. ഗ്രോബാഗ് നിറയ്ക്കാന്‍ വേണ്ട വസ്തുക്കള്‍.

1. രണ്ട് കൊട്ട കല്ല് കളഞ്ഞ മേല്‍ മണ്ണ്
2. രണ്ട് കൊട്ട ചകിരിച്ചോര്‍.
3. രണ്ട് കൊട്ട ഉണങ്ങിയ കരിക്കില.
4. ഒരു കൊട്ട ചാണകപൊടി
5. ഒരു കിലോ എല്ല് പൊടി.

മേല്‍ പറഞ്ഞ എല്ലാവകകളും കൂട്ടി നന്നായി ഇളക്കി ഗ്രോ ബാഗിന്റെ അറുപത് ശതമാനം നിറയ്ക്കുക. ബാക്കി വരുന്ന മിശ്രിതം മാറ്റിവെക്കുക. ഇത് പിന്നീട് വളപ്രയോഗത്തിന് ശേഷം വിതറി കൊടുക്കാന്‍ ഉപയോഗിക്കാം. ഇങ്ങനെ അറുപത് ശതമാനം നിറച്ച ഗ്രോ ബാഗിന്റെ ഒത്തനടുവില്‍ ചെറുകുഴിയുണ്ടാക്കി മുളവന്ന ചേനയോ അല്ലങ്കില്‍ ഇഷ്ടമുള്ള മറ്റ് കിഴങ്ങ് വര്‍ഗങ്ങളോ നടാം. കപ്പയാണ് നടുന്നതെങ്കില്‍ 12-15 സെ.മി നീളത്തില്‍ നല്ല മൂപ്പെത്തിയ കപ്പ തണ്ട് മുറിച്ച് താഴെ ഭാഗത്തെ രണ്ട് മുട്ട് മണ്ണിന്റെ അടിയില്‍ വരത്തക്കവിധത്തില്‍ താഴ്ത്തി നടണം. വളപ്രയോഗവും പരിപാലനവുമെല്ലാം മറ്റു ഗ്രോബാഗ് കൃഷികള്‍ പോലെ തന്നെ മതി.

By Farm News