ഗോമൂത്രം-കാന്താരിമുളക് മിശ്രിതം
ഒരു കൈ നിറയെ കാന്താരി മുളകരച്ച് ഒരു ലിറ്റര് ഗോമൂത്രത്തില് ചേര്ത്ത് അരിച്ചെടുക്കുക. ഇതില് 60 ഗ്രാം ബാര്സോപ്പ് ലയിപ്പിച്ച് ചേര്ത്തിളക്കുക. ഈ മിശ്രിതം 10 ലിറ്റര് വെള്ളം ചേര്ത്ത് നേര്പ്പിച്ച് അരിച്ചെടുത്ത് മൃദുല ശരീരികളായ കീടങ്ങള്ക്കെതിരെ ഉപയോഗിക്കാം. കാറ്റിന്റെ ദിശയില് വേണം ചെടികളില് മിശ്രിതം തളിക്കേണ്ടത്.
വെളുത്തുള്ളി, മുളക് സത്ത്
വെളുത്തുള്ളി- 50 ഗ്രാംപച്ചമുളക്- 25 ഗ്രാംഇഞ്ചി- 50 ഗ്രാം
വെളുത്തുള്ളി 50 ഗ്രാം, 100 മി.ലിറ്റര് വെള്ളത്തില് കുതിര്ക്കുക. അടുത്ത ദിവസം വെളുത്തുള്ളി തൊലി കളഞ്ഞത് അരച്ച് പേസ്റ്റ് ആക്കുക. ഇതേ പോലെ മുളക് 25 ഗ്രാം ,50 മി.ലിറ്റര് വെള്ളത്തിലും ഇഞ്ചി 50ഗ്രാം 100 മി.ലിറ്റര് വെള്ളത്തിലും അരച്ചു പേസ്റ്റാക്കി മൂന്നും കൂടി 3 ലിറ്റര് വെള്ളത്തില് ചേര്ത്ത് ഇളക്കി അരിച്ചു തളിക്കുക.
ഇത് കായീച്ച,തണ്ടുതുരപ്പന്,ഇലച്ചാടികള്,പുഴുക്കള് എന്നിവയെ നിയന്ത്രിക്കും.
വേപ്പിന്കുരു സത്ത്
50 ഗ്രാം വേപ്പിന്കുരു ഒരു ലിറ്റര് വെള്ളത്തില് എന്ന തോതില് ഉപയോഗിക്കാം. മൂപ്പെത്തിയ വേപ്പിന്കുരു പൊടിച്ച് കിഴികെട്ടി വെള്ളത്തില് 12 മണിക്കൂര് മുക്കി വയ്ക്കുക. അതിനുശേഷം കിഴി പലപ്രാവശ്യം വെള്ളത്തില് മുക്കിപ്പിഴിഞ്ഞ് സത്ത് പുറത്തെടുക്കുക. ഇളം തവിട്ട് നിറത്തില് സത്ത് വരുന്നതുവരെ ഇങ്ങനെ കിഴി വെള്ളത്തില് മുക്കിപ്പിഴിഞ്ഞെടുക്കുക. ഈ ലായനി നേരിട്ട് തളിയ്ക്കാം. തണ്ടുതുരപ്പന്,കായ്തുരപ്പന്,ഇലതീനിപ്പുഴുക്കള് എന്നിവയ്ക്കെതിരെ ഫലപ്രദം
പപ്പായ ഇലസത്ത്
100 മി.ലിറ്റര് വെള്ളത്തില് 50 ഗ്രാം നുറുക്കിയ പപ്പായ ഇല മുക്കി ഒരു രാത്രി ഇട്ടുവെയ്ക്കുക. ഇല അടുത്ത ദിവസം ഞെരടിപ്പിഴിഞ്ഞ് എടുത്ത സത്ത് മൂന്ന് നാലിരട്ടി വെള്ളം ചേര്ത്ത് തളിക്കുക. ഇലതീനി പുഴുക്കളെ അകറ്റാന് ഇത് ഫലപ്രദമാകും
പുകയിലക്കഷായം
250 ഗ്രാം പുകയില ചെറുതായി അരിഞ്ഞ് രണ്ടേകാല് ലിറ്റര് വെള്ളത്തില് കുതിര്ത്ത് ഒരു ദിവസം വയ്ക്കുക. അതിനുശേഷം പുകയിലക്കഷണങ്ങള് പിഴിഞ്ഞ് ചണ്ടി മാറ്റുഗക. 60 ഗ്രാം ബാര്സോപ്പ് ചെറിയ കഷണങ്ങളാക്കി കാല് ലിറ്റര് വെള്ളത്തില് ലയിപ്പിക്കുക. സോപ്പ് ലായനി പുകയിലക്കഷായവുമായി നന്നായി യോജിപ്പിക്കുക.
ഈ ലായനി അരിച്ചെടുത്ത് ഏഴിരട്ടി വെള്ളം ചേര്ത്ത് ചെടികളില് തളിക്കാം. മുഞ്ഞ, മീലിമുട്ട, ഇലതീനിപ്പുഴുക്കള്, ശല്ക്കകീടം തുടങ്ങി മൃദുല ശരീരികളായ കീടങ്ങളെ നിയന്ത്രിക്കുന്നതിന് ഇത് ഉപയോഗിക്കാവുന്നതാണ്.
No comments:
Post a Comment