അടുക്കള മാലിന്യത്തോടൊപ്പം നശിപ്പിക്കുന്ന മുട്ടത്തോട് മികച്ചൊരു ജൈവവളവും കീടനാശിനിയുമാണ്. കറിവേപ്പിന് കൂടുതല് തളിരിലകള് വരാനും ഒച്ചുകളെയും ഓടിക്കാനും മണ്ണില് കാല്സ്യത്തിന്റെ അളവ് വര്ധിപ്പിക്കാനും മുട്ടത്തോട് സഹായിക്കും.
*കാല്സ്യത്തിന്റെ കൂടാരം*
കാത്സ്യം കാര്ബണേറ്റ് ധാരാളം മുട്ടത്തോടില് അടങ്ങിയിട്ടുണ്ട്. തോടില് 97 ശതമാനവും ഇതു തന്നെയാണ്. ഫോസ്ഫറസ്, മഗ്നീഷ്യം, സോഡിയം, പൊട്ടാസ്യം പോലുള്ള ധാതുക്കളും മുട്ടത്തോടിലുണ്ട്.
*വളമാക്കാം*
കറിവേപ്പിന് ഏറ്റവും മികച്ച വളമാണ് മുട്ടത്തോട്. മുട്ടത്തോട് പൊടിച്ച് ഇടയ്ക്കിടയ്ക്ക് തടത്തിലിട്ടു കൊടുത്താല് നല്ല തളിരിലകള് ഉണ്ടാകും. മുളക് ഇനങ്ങളും വഴുതനയും കായ്ക്കല് നിര്ത്തിയാല് ചെടിയുടെ ശിഖിരങ്ങള് മുറിച്ച് നിലനിര്ത്തുന്ന പതിവ് നമുക്കുണ്ട്. ഇങ്ങനെ ചെയ്ത ശേഷം മുട്ടത്തോട് പൊടി രണ്ടോ മൂന്നോ സ്പൂണ് ഇട്ടു കൊടുക്കുക. വീണ്ടും ചെടികള്ക്ക് നല്ല വളര്ച്ച ലഭിക്കാന് ഇതു സഹായിക്കും. നല്ല കായ്ഫലവും ലഭിക്കും. വളരെ പതുക്കെമാത്രമേ മുട്ടത്തോട് മണ്ണിലേക്ക് കാത്സ്യത്തിനെ ലഭ്യത ഉറപ്പുവരുത്തൂ. ചെടികളുടെ വളര്ച്ചയ്ക്കും ഇതു തന്നെയാണ് ആവശ്യം. ഗ്രോ ബാഗ് നിറയ്ക്കുമ്പോള് മുട്ടത്തോടിന്റെ പൊടി ഒന്നോ രണ്ടോ ടേബിള് സ്പൂണ് ചേര്ക്കുന്നത് നല്ലതാണ് .
*ഓടിക്കാം, ഒച്ചുകളെയും വണ്ടുകളെയും*
ഗ്രോബാഗില് അടുക്കളത്തോട്ടവും ടെറസ് കൃഷിയും ചെയ്യുന്നവരുടെ പ്രധാന ശത്രുക്കളാണ് ഒച്ചുകളും വണ്ടുകളും. ഇലകളില് പറ്റിപ്പിടിച്ചിരിക്കുന്ന ഇവ ചെടിയെ മൊത്തതില് നശിപ്പിച്ചേ പിന്മാറൂ. നന്നായി ഉണക്കിയ മുട്ടത്തോട് പൊടിച്ചെടുത്ത് ഇലകളിലും കായ്കളിലും വിതറിയാല് ഇവയെ ഓടിക്കാം. ചെടിയില് പറ്റിപ്പിടിച്ചിരിക്കുന്ന വണ്ടുകളുടെയും ഒച്ചുകളുടെയും ദേഹത്ത് പൊടി വിതറുക. ഇവ വേഗം തന്നെ സ്ഥലം വിടും. മുട്ടത്തോട് പൊടി ഗ്ലാസ് ചീളുപോലെ ഇവയുടെ ദേഹത്ത് മുറിവുണ്ടാക്കും. ഗ്രോബാഗിന്റെ തടത്തില് കിടക്കുന്ന ഒച്ചുകളെയും ഇങ്ങനെ നശിപ്പിക്കാം.
(കടപ്പാട് - ജിനേഷ് )
No comments:
Post a Comment